Linza istifadəsi və göz infeksiyaları

Kontakt linzalardan düzgün istifadə edilmədikdə göz bakterial, göbələk və parazitar infeksiyalara yoluxa bilər. Bu infeksiyalar görmənin itirilməsinə, hətta korluğa səbəb ola bilər.

Əlamətlər: ağrı və sancma, gözün yaşarması və qızarması, işığa həssaslıq, göz qapaqlarının şişməsi, axıntı. Bu əlamətlər olarsa, linzanı çıxarın və gecikmədən göz həkiminə müraciət edin.

Düzgün istifadə qaydaları

• Linza ilə yatmayın, əgər göz həkimi başqa cür məsləhət görməyibsə. ABŞ CDC-yə görə linza ilə yatmaq göz infeksiyası riskini 6–8 dəfə artırır.
• Linzanı taxmazdan əvvəl əllərinizi sabun və su ilə yuyub qurulayın.
• Linzanı su ilə yumayın və suda saxlamayın, yalnız xüsusi məhluldan istifadə edin. Qabda köhnə və təzə məhlulu qarışdırmayın.
• Məhlulu həkim məsləhəti olmadan dəyişməyin.
• Linza qabını ən azı 3 ayda bir dəyişin. Linzaların özünü isə göz həkiminin və ya istehsalçının göstərdiyi müddətdə dəyişin.
• Üzgüçülükdən və duşdan əvvəl linzanı çıxarın.
• Göz həkiminə müntəzəm baş çəkin.
• Makiyaj vasitələrinin linzaya düşməsindən qorunun.
• Hər linza yalnız bir nəfər tərəfindən istifadə olunur.